Muqisho (Xogreebnews) Diyaaradaha dagaalka Mareykanka ayaa duqemo cirka ka fuliyay deegaan ku dhow degmada Saakow oo ka tirsan gobolka Jubbada Dhexe, kaasoo ah mid ay gabi ahaantiis gacanta ku hayso kooxda Al-shabaab.

Dadka deegaanka ayaa sheegaya in xalay saqdii dhexe ay maqleen qaraxyo waa-weyn oo ahaa duqeymo diyaaradeed, iyadoo duqeynta ay ka dhacday deegaanka Jawaarey oo ku dhow degmada Saakow.

Ilo-wareedyo qarsoon ayaa sheegay in duqeynta lagu beegsaday sarkaal sare oo Xarakada Al-shabaab ka tirsan, inkastoo aan magaciisa la sheegin, sidoo kalena lama oga khasaaraha ka dhashay duqeyntan.

Warka laga helayo wasaaradda gaashaandhigga Mareykanka ayaa iyana ku xustaywar kooban oo ay soo saartay in weerarkaas uu jiro, balse weli qiimeyn ku hayaan sidii ay wax u dhaceen.

“Waqtigan la joogo waxaa la qiimeynayaa sida ay wax u dhaceen iyo wixii khasaare ah ee duqeynta ka dhashay,” ayaa lagu yidhi wa qoraalka oo kasoo baxay xarunta Pentagon-ka Mareykanka. Iyagoo sheegay inay sida ugu dhakhsiyo badna ay warbixin uga soo saari doonaan duqeyntan.

Dhanka kale, weerarkan ayaa imaanaya xilli Sabtidii lasoo dhaafay uu isku soo dhiibay dowladda Soomaaliya hoggaamiye sare oo ka tirsanaa Xarakada Al-shabaab kaasoo horay loo dul-dhigay baadi-goobkiisa aduun dhan 3 malyan oo Dollar,waxaana la rumaysan yahay in sirdoonka beesha caalamka ee xaruntoodu tahay bariga afrika ay macluumad badan ka heleen ku saabsan kooxda Al-shabaab.