Maah maah soomaaliyeed baa jirta oo tidhaahda Maalintii Hareerahaagaa La eegaa Haabeenkiina Waa La Gaagaabsadaa. maah maah kalena waxay

Ingiriisku Meesha Uu Awr Marinaayo Irbad buu Ku Dayaa Siilaanyo-na Deegaamaynta Berbera Waxay La Gashay Masaajidkii Dekeda.

Qormadii 8 aad:

Maah maah soomaaliyeed baa jirta oo tidhaahda Maalintii Hareerahaagaa La eegaa Haabeenkiina Waa La Gaagaabsadaa. maah maah kalena waxay tidhaahdaa Maalintii Waa Odey Odey Habeenkiina Waa Habar Habar.

hadaba saaxiibayaal waxaa is weydiin mudan marka maalintii inta cadceedu soo jeedo oo dhan aynu ka wada hadalno qaranimada somaliland,wada hadaladii aynu la galnay sonaliya iyo dabaal dega xuska sanad guurada 22 aad ee ka soo wareegtay markii ay somaliland la soo noqotay madaxbanaanideeda, arimahaasi aan soo sheegay wax ka bedelan baa yimaada marka ay cadceedu dhacdo oo waxaa la odhanayaa habeenkii waa habar habare inteena ba heblooyo xagan inoo soo saara.

hadaba siilaanyo hadii anyu maalintii aragno isaga oo madaxweyanaha somaliland ah marka ay cadceedu dhacdo wuxuu noqdaa oday habar jeclo ah, lamana odhan karo wuxuu u cadaalad sameeyaa habar jeclo gudaheeda waayo qabyaaladu maaha wax meel fadhiista oo waxay laba magac u kala bixisaa laba nin oo walaalo ah oo aabo wada dhalay oo kala hooyo ah oo la yidhaahdaa ba heblaayo iyo ba heblaayo.

hadaba go'aamada dalka lagu maamulaana waxay soo baxaan habeenkii markaa go'aan aan ku salaysan rabitaan beeleed iyo deegaamayn masaajido wadata, sideebay ugu dhaqmi karaan umada somaliland inteeda kale.

hadaba akhristow waxaad is weydiisaa halbeega uu madaxweyne siilaano hayso ee uu ku go'aan qaato ma waxaa saldhig u ah qarannimada somaliland mise waxaa saldhig u ah rabitaanak beeshiisa iyo danihiisa khaaska ah, markaa ka dibna waxaan xasuustay qisadan soo socota.

sanadihii lixdamaadkii iyo horaantii todobaatanaadkii ganacsiga badeecadaha kala duwan ee Hargeysa ama somalilandba yimaada waxay ka iman jireen magaalada Cadan ee yementii koonfureed waxaana xiligaasi jiray hooyooyin ama dumar ganacsato ah oo loo yaqaanay shaar shaari oo badeecado kala duwan ka soo raran jiray dekeda magaalada Cadan kana soo dejin jiray dekeda berbera.

hadaba hooyo ka mid ahayd dumarkii shaar shaarida ahayd ee Cadan ka keeni jirat Alaabta oo reer Hargeysa ahayd ayaa marka ay badeecad keento ee badeecada ama alaabtaa qayb ka mid ah iibiso ee ay safarka danbe u baxayso wixii hadhay waxay kaga tegi jirtay odeygeeda, Alaabtana waxay u goyn jirtay sixir ama qiime go'an oo uu ku iibiyo alaabat waxaanu odaygu markiiba ku xisaab tamay hadii uu alaabta ku iibiyo qiimihii ay islaantu alaabta u goysay in isaga aany dilaal ugu dhex jirin waxaanu odeygii u yeedhay nin ay saaxiib ahaayeen oo dilaal ahaa waxaanu kala tashaday oo uu ku yidhi islaantii alaabtan ayay igaga tagtay qiimana way u goysay inaan anigu wax ka dhex helana waan doonayaa ee sideebay arintaasi u suuroobaysaa, ninkii dilaalka ahaa wuxuu odeygii ugu jawaabay qiimahan ay islaantu ay alaabta u goysay waa qiimaha marka alaabta kaash ama naqad lagu iibinaayo waxaynu samaynaynaa arin ay adiga iyo anigaba dani ugu jirto alaabta hadii aynu abaah ku iibino waxaa la siisanayaa qiimo ka badan qiimahan ay islaantu kuu sheegtay alaabta amaah ayaynu ku iibinaynaa qiimaha dheeraadka ah ee inoo soo baxana waynu kala qaybsanaynaa odeygiina arintaasu ogolaaday waxaanu dilaalkii ugu jawaabay afkeenu waa isu amaan.

hadaba marka uu ninkii dilaalka ahaa soo galo istoodhkii ay alaabtu taalay ee uu odeyguna joogay wuxuu dilaalku odhan jiray xaaji intaasi oo kartoon ama bundadood ayaan qaadayaa odeyguna markiiba wuxuu ugu jawaabi jiray IMISAA INOO SAARAN MARKAASUU DILAALKUNA ODHAN JIRAY INTAASAA INOO SAARAN.

Hadaba marka alaabtii la raro wax yar kadibna waxaa la soo qaadi jiray oo qaydhinkana lagu qaybsan jiray lacagtii dul socodka ahayd ee ay ku heshiiyeen dilaalka iyo odeygu, ileyn waatii hore loo yidhi laba qaydhin ku qaybsatay biseyl isuma cawridee, lacagtii islaantana cidiba ismay weydiin jirin.

hadaba islaantii waxay Cadan ka soo noqotay istoodhkii alaabtu taalay oo madhan ama faaruq ah iyo iyada oo wax lacag ah aanu odeygu u hayn oo wixiiba ay amaah ku maqan yihiin.

hadaba halkii islaantii markaa taagnayd waxaa maanta taagan dadweynaha reer somaliland oo istoodhadii madaxtooyada iyo wasaaradaha dawlada sadex sanno ka dib ay islahaayeen waxaa ka buuxsamaya sinaan iyo cadaalad balse ay arkeen in waxa istoodhada ka buuxaaba ay tahay qabyaalad aan loo cumaamadin, halkii markaa uu taagnaa odeygii hantidiisa kula shuraakoobay ninka dilaalka ahi waxaa maanat taagan madaxweyne siilaanyo oo wuxuu masuuliyadii umadu ay u dooratay isaga kula shuraakoobay Dumar iyo Caruur aan la Dooran.

Halkii markaa uu taagnaa ninkii dilaalka ahaana waxaa maanat taagan ninkan uu Siilaanyo Sodoga u yahay ee la yidhaahdo Moorgan, oo safar kasta oo uu siilaanyo dalalka dibada ku tegayo u raaca iyada oo xil muuqda oo uu xukuumada ka ahyaana aysan jirin.

hadaba hadii aynu is bar bar dhigno Moorgankii Siyaad Barre iyo Moorgankan Siilaanyo aadbay u kala duwan yihiin oo moorgankii siyaad barre xil muuqda ayuu ka hayey dawladii markaa jirtay weligiina kaam mid noqon wafti dal dibadeed u baxaya oo uu siyaad barre hogaaminayo xataa markii uu Moorgan ahaa wasiirkii Hawlaha Guud iyo Guriyeynta ee Dawladii Somaliya , Moorgankan siilaanya-na isaga oo aan xil muuqdaba ka hayn xukuumada ayuu hadana noqday xabadii turubka ahayd ee la odhan jiray meel walba gale.

talow siilaanyo iyo moorgankiisu hadii ay wax kale xeerin waayeen miyey garan waayeen in is raacida iyo jid wada marka dadka xididka ah ama xilka isu leh laga wanaagsan yahay sidii ninkii isaga oo ay sodohdii wada socdaan dhabarka la isugu xidhay labadoodii ee yidhi waar dadku siduu isu qabanaayo isugu xidha.

Markaa madaxweyne siilaanyo iyo beeshiisu waxay dadaal ugu jiraan sidii ay hantida umada u boobi lahaayeen isla markaana ay deegaamaynta xaaraanta ah ugu fidin lahaayeen magaalada berbera oo ay hadaba si weyn ay uga dhex muuqdan iyaga oo isu dayaya inay hantida qaranka ka dhistaan guryo badan oo loogu talo galay shaqaalaha badan ee laga shaqaalaysiiyey dekedu inay galaan.

Hadaba isku soo wada duuduuboo Ingiriisku Meesha Uu Awr Marinaayao Irbadbuu Ku Dayaa Siilaanyo-na Deegeemaynta Berbera Waxay La Gashay Masaajidkii Dekeda:

Hadaba saaxiibayaal waxaan idinku dhaafayaa mid ka mid ah heesihii ku jiray riwaayadii shabeel naagood ee uu curiyey Abwaankii Xasan Sheekh Muumin codkoodana ay ku wada qaadaan Abdi Muxumed Aamiin iyo Hibo Maxamed( Hibo Nuura) oo khusaynaysa mwduucan aynu ka hadlayno iyo tayo la aanta xukuumada siilaanyo.

DAB DHAXMOODAY!!!

Doc kastoo la eego

Nolosha dunidu waa dabkee

Haddu dabkii dhaxmoodo

Maxaa lagu diiriyaa?

Waa tilmaan la daahoo

Degdeg kuma haboonee!

Adoo deggan u fiirsoo

Ujeedada ideeqsii.

Ruux haddii la doortoo

Darajada la saariyo

Xilkii daryeeli waayo

Dab dhaxmooday weeyee

Waa su aal da weynoo

Madaxa daalinaysee!

Wixii lagu diirinaayo

Dad weynahaa la weydiin

DUR DUR OOMAY !!!

Durdurkaa laga cabbaa

Biyihiis lagu dabaashaa

Hadduu harraad dareemo

Darkee laga waraabshaa?

Waa tilmaan la daahoo

Deg deg kuma haboonee

Adoo degan ufiirsoo

Ujeedada ideeqsii!

Ruuxa duunyo haystee

Dahabkana barkanayee

Wixiisii deeqi waayaa

Durdur oomay weeyee

Waa su aal da weynoo

Madaxa daalinaysee!

Darkii laga waraabin

Dadweynahaa la weydiin.

DAWO BUKOOTAY !!!

Qofkii cudur dilaayo

Dawadaa bogsiisee

Haday dawo bukooto

Maxaa lagu dabiibaa?

Waa tilmaan la daahoo

Degdeg kuma haboonee

Adoo degan ufiirsoo

Ujeedada ideeqsii.

Dalaalimada diintiyo

Distoorka iyo xeerka

Haddii dabool lasaaro

Dawo bukootay weeyee

Waa su aal da weynoo

Madaxa daalinaysee

Wixii lagu dabiibi

Dadweynahaa la weydiin

DUFAN BASAASAY !!!

Subaga dufankiisa

Dadku ku dhaashadaane

Hadduu dufan basaaso

Maxaa duxdii ka qaaday

Waa tilmaan la daahoo

Deg deg kuma haboonee

Adoo deggan ufiirsoo

ujeeddada i deeqsii

Isku soo wada duuboo

La Soco Taxanaha qormooyinka danbe.

Qalinka:C/risaaq Suudi Nuur

Tel:4425243

Email:suudi88@gmail.com

Hargeysa/Somaliland