|
|
|||||
Shirkadda TELESOM ha uga jawaabto macaamisheeda Somaliland su'aalahan oo khuseeya adeegga shirkadda iyo arrimo khuseeya xidhidhkeeda bulshada.
0
Tuesday February 04, 2014 - 12:00:42 in Maqaallo by Super Admin
W/Q: Yuusuf Ismaaciil Maxamed QAYBTA 1AAD.
Shirkadaha ganacsiga kala duwan ee adeegga bulshada iyo waxsoosaarka
ee dunidu sida ay shaqada ganacsigooda u ilaaliyaan, si ka badan ayay u daneeyaan raalli ahaanshaha iyo qanacsanaanta macaamiishooda, waxana taas dhinac taalla ama ugu muhimsanba shuruucda dawliga ah iyo siyaasadda dawlada ee ku wajahan ilaalinta nolosha iyo danaha bulshada ee xagga ganacsiga iyo hab dhaqanka shirkadaha iyo ganacsatada iyo kobcinta ganacsiga dhinaca kale ee nidaamyada kala duwan ee dhaqaalaha ay duwalka caalamku kala aaminsanyihiin. Waa xaqiiqo jirta oo aan la dafiri Karin in labada dhinacba ee xaggaa hab dhaqanka shirkadaha ganacsiga ka jira Somaliland iyo xagga shuruuda dawliga ah ee ku aadanba ay waxbadani wali qabyo innaga yihiin ama khaas ahaan uu jiro tacadiyo iyo saamayn dhaqaale taban oo shirkadaha ganacsigu ku hayaan dhaqaalaha iyo gaadhsinta bulshada isticmaalka adeegooda ama badeecadahooda ee bulshada iyo sidoo kale dakhligii cashuureed ee dawladdu ka heli lahayd. Shirkadda TELESOM waxay ka midtahay ama ugu horraysa wakhtigan xaadirka ah shirkadaha isgaadhsiinta iyo kuwa ganacsigaba ee ka jira Somaliland, waxanay ku kasbatay taas awood badan oo ay saartay hirgelinta adeegeeda xilli uu tartanka isgaadhsiintu heerka uu immika yahay ka hooseeyay ama aanu jirinba oo ay ku kaliyaysteen suuqa. TELESOM marka loo eego shirkadaha kale ee isgadhsiinta iyo sharaaiga waaweyn ee ganacsiyada kaleba waa shirkadda ugu dakhliga iyo macaashka badan Somaliland ee malaayiin doollaar maalin kasta ka faaiida mujtamaca Somaliland iyadoo saamiga ugu badan ee shirkaddana laga leeyahay Somaliya. Hadaba anigoo ka mid ah macaamiisha shirkadda TELESOM waxan doonayaa inaan halkan ku waydiiyo maamulka iyo masuuliyiinta shirkadda TELESOM, sidoo kalena aan dareensiiyo shacabka iyo dawladdaba arrimo aan u arkayo inay dhaqaale burbur shirkaddu ku hayso dadka iyo dalkaba, inay si danaystenimo ah oo aan dalka lexe jeclo ka gelin uga ganacsanayso, dawakhaad laga qaadayo qaybo ka mid ah adeegga telefoonkeeda iyo arrin ku saabsan sida loogu kalsoonaan karo adeegga shirkadda ee ZAAD. 1. Su'aal: Telesom, maadaama oo ay tahay shirkadda dhaqaalaha ugu badan dadka Somaliland maalin walba ka macaashta, maxay ku soo celisaa dalka ee waxqabad ah ama ay uga gaysataa muwadiniinta ay faaruqisay jeebkooda dhinacyada dhismaha iyo horumarinta adeegyadooda aas'aasiga ah iyo daryeelka guud ee bulshada? Waxan su'aashan u keenay waxa ii muuqata in sida ay uga macaashto shirkadda TELESOM dadka Somaliland aanay waxba ugu celin ee ay ka danaysato oo kaliya. Xataa waxa aad u yar marka shirkadaha kale ee kala duwan loo eego, hantida gaar ahaaneed ee shirkadda TELESOM dalka ka dhisato. 2. Su'aal: Dalka waxa ka jira shirkado isgaadhsiineed oo kala duwan xagga telefoonada oo TELESOM ku jirto sida SOMTEL, TELCOM, Nation Link iyo qaar kale. Kala duwanaanshaha shirkadahani waxay culays badan ku hayaan macaamiisha iyo dadka isticmaalaya adeegooda oo aan wada hadli karin. Waxa jiray sannad dhawaa hindise la doonayay in la mideeyo shirkadahan si dadka loogu nasteexeeyo balse waxa la ogyahay inay hindisahaa diiday shirkadda TELESOM oo iyadu ah tan ugu saamiga badan suuqa. Marka ay shirkaduhu arrintan oo kale ka heshiinayaan, waa sax in la tixgeliyo sida ay ugu kala saami badanyihiin suuqa (Market share), haseyeeshee, marka ay shirkadda TELESOM ku dooday in haddii sida ay iyadu doonayso aan loo dhigayn heshiiska dadka ugu badan ee ay haysato awgeed, su'aashaydu waxay tahay TELESOM ma kooto ayay dadka Somaliland ku haysataa oo madaxooda ayay siday doonto ugu baayactamaysaa? Shirkaddu marka ay illaa heerkan ugu baayactamayso saamiga ku leedahay suuqa ee aanay inyarna tixgelinayn maslaxadda iyo danta bulshada, miyaanay ogayn kaliya inay jirtay fursad ay xilli suuqani bannaana ay ka faaiidaysatay balse ay dadku awoodi karaan in haddii ay dan u arki waayaan ay iyagu ikhtiyaarka leeyihiin oo shirkad kale maalin kaliya u wada wareegi karaan? Midda kale, shirkadda TELESOM iyadoo la ogyahay in saamigeeda ugu badan laga leeyahay Muqdisho, miyaanay TELESOM ogayn in kootadu tahay waxay Somaliland ka dagaalantay ee uga go'day Somaliya? 3. Su'aal: Shirkaddu waxay leedahay adeegga ZAAD oo run ahaantii aan qirayo inuu yahay adeeg wanaagsan oo waxbadan ka taraya hawlaha ganacsiga ama fududaynaya diritaanka lacagaha iyo shaqada guud ee dadka balse ay jiraan arrimo xasaasi ah oo u baahan inay dadku u fiirsadaan. Shirkaddu marka aad ZAAD furanayso, waxay ku waydiinayaan oo kaa qorayaan yaa dhaxalkaaga leh. Haseyeeshee, waxay su'aashaydu tahay taas waxa ka horreeya horta macmiilka adeegan isticmaalaya yaa uga damiin ah inaanu waayi karin ama ku khasaari karin adeegga ZAAD ee shirkadda TELESOM? Barmaamijyada "Software-ka" ah ee tiknooliyadda casriga ah iyo Saatalaydhka dunida u adeegani la xidhiidho ee lacagtii Somaliland oo dhami ku dhacayso maalin walba ama xataa ku kadyso ay ku leeyihiin horta shirkadda TELESDOM ma iyadaa ka damiin ah inaanay waxba ka xumaan nidaamkaas tiknoolajiyadeed ee adeegga shirkadda ZAAD ee ay lacagtii dadka oo dhan ku ururiyeen? Midda kale, dawladda Somaliland ma iyadaa ka masuul ah haddii dadkii adeegan isticmaalaya maalin kaliya xumaado ama dadka la dhaco, waa maxayse siyaasadda uga dejisan dawladda Somaliland adeegga ZAAD? 4. Su'aal: Qofka macmiilka ahi waxa jirtay in marka uu kaadh ka furto shirkadda TELESOM, waxay u diri jireen lacag ay odhan jireen waa "Promotion" ama abaalmarin ahayd taasoo ay shirkaddu joojisay immika. Hadaba su'aashaydu waxay tahay shirkaddu lacagtaas ay soo diri jirtay inta badan jimcayaasha u dambeeya bisha ma waxay ahayd lacag laaluush ah oo ay uga jeedaan inuu qofku adeegooda jeclaato kadibna ay ka go'yaan, mise waxay ahayd mid uu macmiilku xaq ugu lahaa shirkadda oo immika innaga maqan? Qodod labaad oo su'aashan ku jiraa wuxu yahay, abaalmarinta yar ama "Promotion" ka yar ee markaad immika ku shubato ay sheegaan inuu kuula socdo, waxan ogaaday inuu qoraal uun yahay ee waxa uu qofku isticmaalaya tahay intii uu ku shubtay oo kaliya, markaa su'aashaydu waxay tahay shirkadda TELESOM maxay u khaayimaysaa macaamiisheeda ay sida weyn uga macaashto? 5. Su'aal: Shirkadda TELESOM waxay uga ganacsatadaa adeegga isgaadhsiinta noocyo tiro badan oo aan ta hadalku ku jirin kuwaasoo ay ka midtahay farriimaha xayaysiiska ganacsatada ee joogtada ah iyo wararka ay ilihii warbaahinta ku qabsatay. Farriimaha mobile-ka TELESOM waxay noqdeen qaar xad dhaaf, oo aanay shirkaddu wakhti u eegin ee saacad kasta soo dhaca. Waxa laga yaabaa adigoo hurda inay ku toosiyaan oo hurdadaadii kaaga ciyaaraan, waxana laga yaabaa inay ku toosiyaan oo cid aad farriin ka sugaysay aad mooddo balse aad ku hungowdo. Hadaba su'aashaydu waxay tahay shirkadda TELESOM dadka wakhtigooda miyay ka iibsatay oo siday doonto ayay markaas ula dhaqmaysaa xagga dirista farriimaha? Maqaalkan oo noqon doonaa mid taxane ah, waxan ku soo koobay qaybta koowaad shantan su'aalood iyo nuxurkooda, waxanan ka sugayaa jawaabaha su'aalahan maamulka shirkadda TELESOM inay uga soo jawaabaan macaamiisha adeegooda telefoonnaa iyo ZAAD-ka ee Somaliland. LA SOCO------- Yuusuf Maxamed Ismaaciil Muwaadin Somalilander ah, macmiil TELESOM ah Tel: 063 4346680 Hargeisa, Somaliland |
|
||||
Shirkadda TELESOM ha uga jawaabto macaamisheeda Somaliland su'aalahan oo khuseeya adeegga shirkadda iyo arrimo khuseeya xidhidhkeeda bulshada.
W/Q: Yuusuf Ismaaciil Maxamed QAYBTA 1AAD.