Gabay “Abaal-Gud”, oo SNM loo tiriyey Waxaa tiriyey: Jamaal Cali Xuseen, April 5teedii, 2009kii isagoo ugu talo galay xuska munaasibadan ku beegan April 6deeda oo ah maalintii SNM la aasaasay sanadkii 1981 kii, oo ku began maanta oo laga joogo 32-sanadood, waxaanu Gabaygii isaga oo dhameystiran uu u dhignaa sidan:

GABAY L a Yidhaahdo (Abaal-Gud) Oo U Murrashaxa Madaxweynanimada Xisbiga UCID Jamaal Cali Xuseen U Tiriyey SNM

Gabay “Abaal-Gud”, oo SNM loo tiriyey Waxaa tiriyey: Jamaal Cali Xuseen, April 5teedii, 2009kii isagoo ugu talo galay xuska munaasibadan ku beegan April 6deeda oo ah maalintii SNM la aasaasay sanadkii 1981 kii, oo ku began maanta oo laga joogo 32-sanadood, waxaanu Gabaygii isaga oo dhameystiran uu u dhignaa sidan:

1. Halgan gobannimo doonkii SNM, guul ku soo khatimye

2. Waa mid taariikh gun dheer galo, xil la soo gutayee

3. Gef iyo gardara laga degaalamay, iyo gunnimo diide

4. Ged-gedoonka waayuhu wuu qiri, taariikhda guudi

5. Gurmadkii maatida u kacaye, gooyey taladeeda

6. Waa kuwii ka gam?in xilkoodi, gudashadiisiiye

7. Gal-dalool iyo quudhsi raggii, gardarada diidey

8. Gujo nacasta raggii ka dhiidhiyey, garasho dheeraada

9. Waa kuwii godkuun ku jiree, kaga gig siinaayey

10. Waa kuwii god iyo dhufays galee, guntad ku raameeystay

11. Waa kuwii gelin iyo habeen, cadowga goobaayey

12. Waa kuwii goor walba naftood, guuto lagu saaray

13. Gowraca raggii joojiyee, kaga gariirsiiyey

14. Hooyooyinkii goblamayee, gabanadood waayey

15. Guryaha raggii u iibiyee, gubayey laabtooda

16. Gawaadhida kuwii keenayee, goownaxyada buuray

17. Gaashaan qaadkii qurbahee, cadho galiilyooday

18. Godobtii darneyd kuwii qiraye, dibada gaadhsiiyey

19. Kuwii qalin muruq ku gooyee, cadowga giigiimay

20. Giiryaalle raggii eryadee, geedka sare fuushey

21. Geesiyadii geedka u galee, goobtan ka xoreeyay

22. Inaynu maanta guushood xusnaa, gaar bay noo tahaye.

23. Taariikh ma gabowdo abidkeed, kana gun dheer ceelle

24. Abriil lix waa in loo guddaa, abaalkay soo gashaye

25. Guul waa in lagu suntaa gugaas, geyi barwaaqeede

26. Abriil duco waa in loo guntaa, geesi oo idile

27. Xasuuso geesiyadii halgame, guusha noo dhaliyey.

28. Geedba marbay qolofi ka dhacdaa, gorada guudkiisa

29. Ummadi gobanimo way higsataa, goor la gawracayee

30. Gantaalihi shicibka ku dhiciyo, nabaradii gaadhey

31. Gef laynaga galuu ahaayoo, guul Ilaah bixiyee

32. Halgan dhiiga dhuuxiisiyo gala, jiidhka gudahiisa

33. Mid aynu u wada guntanu ahaa, shicibka guushiise

34. Guhaadkii haween iyo carruur, Talisku gaadhsiiyey

35. Geeddi iyo jid dheer baa loo mariyo, geyi shisheedaade

36. Gufaac dabayl iyo habar dugaag, guri lagula hoydee

37. Guryo iyo adduun baa ku lumay, hanti ma guuraane

38. Galbeed iyo Barri buu is qabsaday, galalac baaruude

39. Kuwii gardarada waday waa tii, geesi uu helaye

40. Raggii garaad iyo aqoonba, Guulle ku manaystay

41. Geesiyadii geedka u galee, goobtan ka xoreeyay

42. Inaynu maanta guushood xusnaa, gaar bay noo tahaye.

43. Taariikh ma gabowdo abidkeed, kana gun dheer ceelle

44. Abriil lix waa in loo guddaa, abaalkay soo gashaye

45. Guul waa in lagu suntaa gugaas, geyi barwaaqeede

46. Abriil duco waa in loo guntaa, geesi oo idile

47. Xasuuso geesiyadii halgame, guusha noo dhaliyey.

48. Hadaan halgan gobonmino dirirkii, gaar u falanqeeyo

49. Olol iyo dhib baa loo dhex galay, gumuc rasaaseede

50. Gaajiyo haraad baa laga mutiyo, geerri iyo ciille

51. Maxaa mujaahid geydhanoo, geesiyaal wada ah

52. Maxay gaashaan adag noo noqdeen, gedo wanaagooda

53. Maxaa miskiin guri laga dumiyey, cadho la giigiimey

54. Maxay giraanti adduunyadu mirtay, geeshash odayaal ah

55. Maxaa nolol sharaf lehoo gudheyn, nalagu soo giijey

56. Guhaad ciil iyo cadho kuwii, shicibka gaadhsiiyey

57. Dawlad ku sheegtii gaadmaduun, galabki qaadeeysay

58. Seetada nimankii goostaye, gaaska ku shubaayey

59. Gocorro reenkii kuwii ummadda, nabarka gaadhsiiyey

60. Kuwii gardarrada waday waa tii, geesi uu helaye

61. Geesiyadii jiidhku damqadaye, gama?na loo diideey

62. Waa kuwii siday guul u dhaliyaan, gaajo ax odhanaynin

63. Waa kuway gurmad miig iyo kaare, gawda uun ku hayeen

64. Waa kuwii mar qudha ka gabanee, goolka dhalinaayey

65. Geesiyadaa geedka u galee, goobtan ka xoreeyay

66. Inaynu maanta guushood xusnaa, gaar bay noo tahaye.

67. Taariikh ma gabowdo abidkeed, kana gun dheer ceelle

68. Abriil lix waa in loo guddaa, abaalkay soo gashaye

69. Guul waa in lagu suntaa gugaas, geyi barwaaqeede

70. Abriil duco waa in loo guntaa, geesi oo idile

71. Xasuuso geesiyadii halgame, guusha noo dhaliyey.

72. Kun goblamay kun gaatimaayiyo, kuman kaloo giiran

73. Kun gabanaaya kun geel lehiyo, kuman gogolba haaysan

74. Iyo kuman geesiyaal ahoo, Guulle ku maneeystay

75. Iyo kuman in gacmaha lagu sugo, geliyey laabtooda

76. Iyo kuman in gaar lo-tashado, laba gudboonaatay

77. Iyo kuman xarago la giigsano, guri ku faanaaya

78. Iyo kuman gaajo olalayoo, garowna aan haaysan

79. Iyo kuman badaha goobayoo, dhoof u gubanaaya

80. Iyo kuman godob li?i seexdayo, gurina aan doonin

81. Iyo kuman barakaca gacan qabtiyo, garabka Soomaali

82. Iyo kuman gaadh inaga hayoo, Qaranka guuleeyey

83. Iyo kuman gabdhoodo fariidoo, gacalka soo raadsha

84. Iyo kuman guyaal iyo guyaal, gurayey maandeeqda

85. Iyo kuman digsiga goobayoo, hilib u googooyey

86. Iyo kuman gaadh wadeen ahoo, nabad ku guubaabshay

87. Arligenan dawladnimo guddoonshe, gaadhka lagu meershay

88. Goobtaan hadhkiyo nabada ahe, heerka sare gaadhey

89. Waa mid laabtayda gilgilaysoo, laga gabyaa maante

90. Gurbaan garab kuugu jira baa, gacalku kuu hayne

91. Guul-guul colaad yaan la gelin, weerar gacaleede

92. Waa in guushaas la giijiyo, oon la gaba-gabeynin

93. Waa in guushaas la gaagixin, Guulle noo dhaliyey

94. Waa in geed lagu meeriyaa, oon gacalku ooyin

95. Mar kale gardaro darteed yaan, shacabku uu guurin

96. Garashadu waa inay gudoomisa, gogolna keentaaye

97. Gurmadki waa inuu astaan noqdo, lagu xardhaa guulle

98. Halgankii geesiyadii waa in, loo garwaaqsadaye

99. Xasuusoo geesiyadaa ogow, garabka noo muujey.

100. Taariikh ma gabowdo abidkeed, kana gun dheer ceelle

101. Abriil lix waa in loo guddaa, abaalkay soo gashaye

102. Guul waa in lagu suntaa gugaas, geyi barwaaqeede

103. Abriil duco waa in loo guntaa, geesi oo idile

104. Godkii lagu xasuustaa kuli, gabanadeeniiye

105. Geesiyadii duco loo mari, gelinba aamiinta

106. Inuu Guudka sare jannadii, Eebaheen geliyo