Hargeysa, (Xogreeb.com) - Wasiirka Wasaaradda Arimaha Gudaha JSL Maxamed Kaahin Axmed, oo ay wehelinayaan Agaasimaha Guud ee Wasaaradda Arimaha Gudaha Maxamed Yuusuf Ismaaciil iyo qaar ka mid ah Agaasime Waaxeedyada Wasaaradda ayaa kulan la qaatay Gudida Dhaqaalaha iyo Ganacsiga ee Golaha Wakiilada Somaliland.

Kulankan oo ka qabsoomay Xarunta Golaha Wakiilada ayaa waxaa war bixin ku saabsan Miisaaniyada Wasaaradda Arimaha Gudaha iyo Kababka Dawladaha Hoose lagaga dhegaystey Wasiirka Wasaaradda Arimaha Gudaha iyo masuuliyiinta kale ee Wasaaradda, iyadoo ay hor taallo Golaha Wakiilada Miisaaniyadda Qaranka ee 2023.

Wasiirka Wasaaradda Arimaha Gudaha JSL Maxamed Kaahin Axmed, ayaa war bixin dhamaystiran Siiyey Guddida Dhaqaalaha iyo Ganacsiga ee Golaha Wakiilada,isagoo ka war bixiyey guud ahaan Miisaaniyadda Wasaaradda, dhaqaalaha ay Dawladaha Hoose ka helaan Xukuumadda dhexe, taasoo soo marta Wasaaradda Arimaha Gudaha.

Dhinaca kale Wasiirka ayaa ka wada jawaabay Su'aalihii ay weydiiyeen Guddida Dhaqaalaha Golaha Wakiilada,iyadoo kulankuna ku soo dhamaatay isfaham buuxa iyo wada shaqaynta Gudida Dhaqaalaha iyo Wasaaradda Arimaha Gudaha.

Cabdilaahi Axmed Caarshe 

Agaasimaha Warbaahinta iyo Xidhiidhka Dadweynaha ee Wasaaradda Arimaha Gudaha JSL.